A ONU empeora o diagnóstico sobre a situación climática
A situación climática é aínda peor do que se cría. Se o último informe do IPCC xa era preocupante, a Organización Meteorolóxica Mundial ( OMM), dependente da ONU, acaba de desvelar que os seus prognósticos quedaron curtos, porque traballaba con datos de dous anos de antigüidade. Coas evidencias máis recentes na man, a OMM non descarta un aumento da temperatura que directamente duplique o obxecto de 1,5º C do Acordo de París.
O planeta segue na senda dun quecemento acelerado que podería levar a un aumento da temperatura de ata 3 graos centígrados, fronte aos 1,5 expostos no Acordo de París ou os 2 considerados como o límite máximo asumible, segundo advertiu onte xoves o secretario xeral da Organización Meteorolóxica Mundial ( OMM), Petteri Taalas, ao presentar un informe cos datos máis recentes sobre o clima.
“Actualmente imos camiño dun quecemento de 3 graos, en lugar de 1,5 a 2 graos. Sería beneficioso para o benestar do ser humano, a natureza e o planeta manternos no obxectivo de 1,5ºC”, dixo o científico, quen expuxo nunha conferencia de prensa varios datos que desmenten que a pandemia tivo algunha repercusión beneficiosa -máis aló do curto prazo- en relación co cambio climático.
A OMM xa conta con medicións que mostran que, aínda que as emisións de dióxido de carbono reducíronse durante algún tempo debido ás medidas de confinamento, unha vez pasado ese período están a aumentar rapidamente.
Taalas comparou a forma como a Covid-19 perturbou a vida de todos co impacto que terá o cambio climático, que -asegurou- será moito máis grave e a moi longo prazo, en particular se os países non toman medidas decididas para mitigar este fenómeno.
“Se fracasamos na mitigación teremos un problema permanente durante centos ou quizais miles de anos, e os seus efectos no benestar humano e na economía serán moito máis dramáticos que os que tivo a pandemia, e convén lembralo”, salientou, segundo informa Efe.
As estimacións citadas no informe indican que entre xaneiro e xullo pasados as emisións mundiais dos sectores da enerxía eléctrica e a industria xa se atopaban ao mesmo nivel e mesmo eran superiores ao observado no mesmo período previo á crise sanitaria.
As emisións procedentes do transporte terrestre reducíronse ao redor do 5%, o que dá como resultado (sen contar o transporte aéreo e marítimo) que no primeiros sete meses deste ano as emisións mantivéronse nos mesmos niveis de 2019.
A subida de 1,5ºC, xa dentro de cinco anos
O informe expón que é moi probable que xa no próximos cinco anos as temperaturas superen temporalmente o limiar dos 1,5 graos centígrados con respecto ás rexistradas na era pre-industrial (1850-1900).
Seguindo a mesma tendencia, a concentración na atmosfera dos gases que producen o efecto invernadoiro -detrás do quecemento global- segue superando récords.
Así mesmo, este informe -preparado pola OMM en colaboración con outras axencias do sistema de Nacións Unidas- confirma que as temperaturas medias entre 2017 e 2021 son as máis elevadas rexistradas no período dun lustro e foron entre 1,06 e 1,26 graos máis altas que hai 150 anos.
“O que ocorreu no último século é claramente unha anomalía se o comparamos coas estimacións que temos dos últimos 100.000 e isto ten un impacto importante na saúde humana”, explicou Taalas.
Diferenza co informe do IPCC
O informe que presentou o pasado agosto o Panel Intergobernamental sobre o Cambio Climático (coñecido como IPCC, polas súas siglas en inglés) indicaba que ese aumento da temperatura estaba en torno ao 1,1 %, pero os datos que utilizou tiñan un par de anos de atraso pola natureza da análise que requiren, mentres que o informe presentado hoxe cobre ata a primeira metade deste ano.
Taalas lembrou que o aumento da temperatura da atmosfera tamén está relacionado con recentes fenómenos meteorolóxicos extremos, como as recentes ondas de calor no oeste de Canadá e de Estados Unidos, así como as graves inundacións que tiveron lugar en Alemaña e Bélxica.
En ambos os casos tratouse de fenómenos moi inusuais, que adoitan ocorrer cada cen anos, pero que a causa do cambio climático “agora poden pasar cada vinte anos ou mesmo menos”, segundo o secretario xeral da OMM.
Imaxe por Kelly Sikkema.
Voltar o listado